Праект партала
Густ
02.04.2021 / 15:53
Культ неюнацтва: мадэлі plus age выйдуць на подыум на 20-м Беларускім тыдні моды

У гэтыя першыя красавіцкія выходныя ў Мінску адбудзецца 20-ы Belarus Fashion Week. На культавым подыуме будуць прадстаўлены калекцыі ад вядучых дызайнераў і брэндаў: BUTER, NELVA, LSD Clothing, Minina_Style, LOVERANI, Natalia Korzh, Khmelenko for Parimatch, Davidova sponsored by Rexona, Totti Swimwear, T.Efremova powered by LG, Harydavets.

Таццяна Брэдзелева.

Задачы галоўнай fashion-падзеі захоўваюцца — паказаць патэнцыял крэатыўных ідэй беларускіх дызайнераў і даць старт новым імёнам у модзе. А вось фармат правядзення адаптуецца да новых патрабаванняў і стандартаў. Упершыню прэзентацыі новых калекцый пройдуць анлайн і будуць даступныя ўсім ахвотным да прагляду на сайце bfw.by і на экране ТРЦ Gallery Minsk. А ў паказах будуць удзельнічаць мадэлі рознага ўзросту, камплекцыі і ўзроўню падрыхтоўкі, у тым ліку пераможцы конкурсаў прыгажосці розных гадоў.

У апошнія гады цэнтральнымі фігурамі на подыуме сталі ўзроставыя мадэлі. Зараз куцюр'е ўсё часцей робяць стаўкі на прыгажунь 50 і нават 70+. Працягласць жыцця ва ўсім свеце павялічваецца, і сучасная мода проста не можа быць арыентавана толькі на пакаленне «пэпсі». У паказах на Беларускім тыдні моды таксама будуць удзельнічаць мадэлі age plus.

«Дарэчы, Belarus Fashion Week заўсёды адрознівалася мабільнасцю і інавацыйным падыходам да дэфіле, — заўважае заснавальнік і кіраўнік Belarus Fashion Week Яніна Ганчарова. — Многія дызайнеры самі шукаюць для дэманстрацыі мадэляў, якія бліжэй па ўзросце да патэнцыйныхпакупнікоў той ці іншай калекцыі. Каб яны бачылі ў вобразе даму іх узросту, росту і камплекцыі. Вядома, культ маладосці існуе і сёння. Але ўсё часцей на подыумах можна ўбачыць дагледжаных прыгажунь з пышнымі формамі і высакароднай сівізной.

Запрашэнне прадставіць беларускую калекцыю на подыуме атрымала і 57-гадовая Таццяна Брэдзелева, пераможца міжнароднага конкурсу Ms. & Mrs. Top of the World Classic 2020. У мадэлінг яна прыйшла толькі пару гадоў таму. Гэта яе чацвёрты выхад на подыум, і першы — на такім высокім узроўні.

Таццяна Брэдзелева.

«Гэта было нечакана. У мінулым 19-м сезоне Belarus Fashion Week я была глядачкай, рабіла першыя крокі ў школе мадэлінгу і нават уявіць не магла, што ў наступны раз мяне запросяць ужо ў статусе ўдзельніцы: тады калекцыі прадстаўлялі толькі маладыя мадэлі. Прыемна назіраць, што ўзроставыя стэрэатыпы ў свеце моды разбураюцца і ў нас. Я буду прадстаўляць калекцыю Віцебскага дызайнера Тамары Гарыдавец. Яе дызайнерскія ідэі скіраваны акурат на ўзроставых дам.

У 55 гадоў кожная жанчына імкнецца да камфорту. Але гэта не значыць, што пераступіўшы гэтуюўзроставую мяжу трэба адпраўляцца ў краму за непрывабнымі артапедычнымі чаравікамі і сукенкай ніжэй каленяў. Мая фігура, 44 памер, лад жыцця і мыслення дазваляюць мне насіць любыя ўборы: ад класікі да ірваных джынсаў. Стыльнай і моднай можна быць у любым узросце. Хоць, прызнацца, я больш сачу за сабой, чым за модай. Як казала Како Шанэль, «узрост для жанчыны — не самае галоўнае: можна быць фантастычнай у 20 гадоў, чароўнай у 40 і заставацца неверагодна прывабнайда канца дзён сваіх».

Адной з яркіх тэм на Беларускім тыдні моды стане паказ этычнай моды — калекцый, створаных з прыродных матэрыялаў: бавоўны, лёну, бамбука, шоўку.

Дызайнер Павел Кацэвіч пакажа новую калекцыю свайго брэнда Key-to-art, створаную з баваўняных, ваўняных тканін, а таксама выпрацаваных з крапівы або эўкаліпта. Брэнд Zanka прадставіць калекцыю «Думкі» з натуральнай пражы і тканак з даданнем перапрацаваных матэрыялаў. «Еду да таткі» — новыя працы Таццяны Тур, для якіх яна выбрала земляныя адценні і натуральныя тканіны, каб распавесці гісторыю пра ўзаемасувязь чалавека і прыроды.

Таксама дарослыя мадэлі будуць прадстаўлены ў калекцыях дызайнера Таццяны Яфрэмавай, а ў Вольгі Барабаншчыкавай выйдуць мадэлі з жывоцікамі, бо Loverani стварае вопратку і для цяжарных. А на паказе Davidova by Rexona будуць выступаць мадэлі-тынэйджары разам з маладымі дзяўчатамі. Увогуле, мода як вонкава, так і з пункту гледжання падачы модных вобразаў робіцца адказнай уадносінах да пакупнікоў.

 

Таццяна Брэдзелева.

Яніна Ганчарова назвала галоўнай асаблівасцю гэтага сезону тое, што ўсе модныя вобразы, прадстаўленыя на подыуме, можна будзе набыць у крамах і студыях брэндаў адразу ж пасля паказу.

«Сёння ўвесь свет кажа, што праз пандэмію цікавасць да лакальных вытворцаў адзення павялічваецца, і Беларусь не выключэнне. Сацыяльна-актыўнае пакаленне любіць і купляе адзенне мясцовых аўтараў і брэндаў, чые імёны на слыху. Гэта нават трэнд — апранацца ў made in Belarus і трансляваць у сацсетках думку, што гэта актуальна. Ну а наведванне моднага паказу стала адным з любімых варыянтаў баўлення часу для моднікаў», — адзначае Яніна.

Nina.nn.by

каментаваць

Націсканьне кнопкі «Дадаць каментар» азначае згоду з рэкамендацыямі па абмеркаванні

СПЕЦПРАЕКТ2 матэрыяла Шура-бура