Знайшлі для вас некалькі праграм, якія дапамогуць палепшыць прафесійныя скілы ці адкрыць для сябе новую сферу інтарэсаў.
Вольга Гарбунова, кіраўніца «Радзіславы».
Грамадскае аб'яднанне «Радзіслава», якое дапамагае ахвярам гвалту, прапануе актывісткам, сацыяльным работніцам, псіхалагіням ці студэнткам апошніх курсаў падобных спецыяльнасцяў прайсці навучанне па праграме «Падрыхтоўка консультантак тэлефона даверу/кругласутачнага тэлефона экстраннай дапамогі для жанчын, якія пацярпелі ад гвалту», з далейшым прыцягненнем у якасці валанцёрак да працы на лініі «Прытулку».
У дадзенай навучальнай праграме адпрацоўваюцца навыкі па наступных тэмах:
• асаблівасці тэлефоннай камунікацыі і тэлефоннай дапамогі. Уліковая дакументацыя;
• забароненыя прыёмы і памылкі тэлефоннага дыялогу;
• патрабаванні да кансультанткі «Тэлефона даверу». Этычныя прынцыпы ў тэлефонным кансультаванні;
• першая гутарка з абаненткай. Этапы кансультавання. Прыёмы актыўнага слухання.
• феномен «выгарання» у тэлефонных кансультантак;
• асаблівасці тэлефоннага кансультавання пацярпелых ад хатняга гвалту, сэксуальнага гвалту, людзей якія перажылі гора, страту, людзей якія маюць суіцыдальныя думкі і гэтак далей;
• сацыяльна-псіхалагічная і інфармацыйная дапамога пры перанакіраванні ў «Прытулак» і іншыя дзяржаўныя і недзяржаўныя структуры (прытулкі, міліцыя, пракуратура, суды, бальніцы, паліклінікі) і іншае.
Арганізацыйны збор пройдзе а 10.00 12-га верасня (серада) па адрасе: Мінск, вул. Валгаградская, 21а, 1 паверх, вялікая зала. Гэта будынак мінскага Тэрытарыяльнага цэнтра сацыяльнага абслугоўвання насельніцтва Першамайскага раёна.
Ілюстрацыйнае фота. Крыніца: obzor.westsib.ru.
Праваабарончая арганізацыя «Яе правы» вырашыла пазнаёміць і аб'яднаць жанчын, якія толькі пачынаюць прафесійны шлях, і тых, хто дасягнуў поспехаў у кар'еры і гатовы падзяліцца досведам.
Для гэтага ладзіцца ментарская праграма для жанчын у лідарстве.
«Запускаючы гэтую праграму, мы хочам падтрымаць жанчын, якія займаюць менеджарскія пазіцыі ў розных сферах (бізнэс, некамерцыйныя арганізацыі, дзяржсектар, міжнародныя арганізацыі і г. д.) і тых, хто жадае, дасягаць яшчэ большых прафесійных вынікаў, яшчэ больш высокіх кіраўніцкіх пазіцый, а таксама тых, хто лічыць сябе лідаркай і адчувае жаданне ісці наперад», — распавядаюць арганізатаркі.
Падаць заяўку на ўдзел у праграме можна да 16 верасня.
Nina.nn.by