Праект партала
Тое-сёе
18.05.2018 / 15:38
Вясёлыя гісторыі пра гарадское дзяцінства ў малюнках: прайшла прэзентацыя «Казак старога Адамкова»2

Пісьменніца Наталка Харытанюк і мастачка Воля Кузьміч прэзентавалі ў чацвер 17 траўня ў мінскай галерэі «Арт-Беларусь» ілюстраваную кнігу гісторый для дзяцей і дарослых «Казкі старога Адамкова». Прэзентацыя прайшла ў суправаджэнні выставы ілюстрацый Волі Кузьміч.

Фота: Юрый Сідун

«Вось толькі ўзяла ў рукі, гартаю ды ўжо шчаслівая ад таго, як жа якасна гэта зроблена!» — гучна дзеліцца з сяброўкай уражаннямі адна з маладых мам, якая падтрымала выданне кнігі і прыйшла на прэзентацыю. «Складана знайсці ў Беларусі кнігу, зробленую тут на нашай мове, у якой усё супадае: і тэкст захоплівае, і ілюстрацыі грунтоўныя, і кніга не развальваецца ў руках маленькіх чытачоў».

«Без кампрамісаў да якасці» — гэта адзін з прынцыпаў у стварэнні «Казак старога Адамкова», у якіх згаварыліся пісьменніца Наталка Харытанюк і мастачка Воля Кузьміч. Прынцып удалося рэалізаваць уважлівай працай і не без цудаў.

Фота: Юрый Сідун

У пачатку краўдфандынгавай кампаніі аўтаркі планавалі, як будуць шматкрокава паслядоўна і творча расказваць патэнцыйным чытачам-спонсарам, чаму важна творы пераўтвараць у якасныя прадукты для беларускіх дзетак і іх бацькоў. Але неабходная для выдання сума была імкліва сабраная ўжо літаральна на першым кроку. На трэці дзень пасля публікацыі відэа, у якім дзяўчаты распавядалі пра старт кампаніі і прадставілі сваю задуму, лічба сабраных сродкаў на платформе «Talaka» перавысіла 100%.

Падтрымка чытачоў і спонсараў дазволіла аўтаркам увасобіць свае самыя амбітныя мары і планы. Тры казкі размясціліся на 44 поўнакаляровых шчыльных старонках вялікім фарматам, а кожны разгорт кнігі змяшчае дэталізаваныя вялікія сюжэтныя ілюстрацыі.

Фота: Юрый Сідун

На прэзентацыю ў мінскай галерэі «Арт-Беларусь» у чацвер 17 траўня прыйшлі сем’і з дзецьмі, пісьменнікі і мастакі. Урачыстую імпрэзу ад імя галерэі адкрыў Аляксандр Зіменка, кандыдат мастацтвазнаўства і куратар карпаратыўнай калекцыі Белгазпрамбанка. Пісьменнік і мастак Адам Глобус пасля натхняльнай прамовы пра казкі і літаратуру, прэзентаваў Наталлі і Волі кнігу «Казімір Малевіч для дзяцей», якая таксама была сёлета выдадзеная праз падтрымку чытачоў. Рэдактарка кнігі пісьменніца Марыя Мартысевіч пачытала вясёлыя правакацыйныя вершы пра дзетак. Аўтарак таксама прыйшоў павіншаваць Зміцер Дашкевіч, кампанія «Цэсляры» якога стала адным з галоўных спонсараў выдання кнігі.

«А як жа без мульцікаў?!» — абрадвала дзетак на прэзентацыі мастачка Воля Кузьміч.

Доўгія чатыры месяцы працы над кнігай аўтаркі прэзентавалі аўдыторыі ў кароткім роліку з мультыплікацыяй, відэа і фотаздымкамі.

Кніга «Казкі старога Адамкова» даступная ў продажы ў кнігарні Логвінаў, галерэі «Арт-Беларусь» і краме Symbal.by.

каментаваць

Націсканьне кнопкі «Дадаць каментар» азначае згоду з рэкамендацыямі па абмеркаванні

СПЕЦПРАЕКТ2 матэрыяла Шура-бура