Праект партала
Стасункі
09.12.2019 / 17:13
Аўтарка скандальнай брашуры «10 прычын захаваць цнатлівасць» патлумачыла, што мела на ўвазе24

Брашурка пабудаваная па прынцыпе 10 тэзісаў, якія тлумачаць, чаму дзяўчынцы неабходна захоўваць цнатлівасць да шлюбу. 

Некаторыя пункты гэтай брашуры выклікалі ў інтэрнаўтаў змяшаныя пачуцці.

Напрыклад, пункт пра тое, што будучы муж будзе абражаць сваю жонку, гаварыць, што яна дрэнная гаспадыня, але ў адсутнасці цнатлівасці абвінаваціць не зможа. «Гэта ўжо штосьці!» — чытаем у брашуры.

«Наша Ніна» папрасіла аўтарку брашуры Вераніку Сярдзюк, старшыню грамадскай арганізацыі «Цэнтр падтрымкі сям’і і мацярынства «Матуля», расказваць пра свой тэкст.

Вераніка Сярдзюк.

«Асноўны напрамак дзейнасці нашай арганізацыі — гэта прадухіленне абортаў, захаванне сям’і. Я лічу, што мы ўжо 8 год, а менавіта столькі існуе наш цэнтр, робім вялікую справу — ратуем дзяцей, якія яшчэ не нарадзіліся. І ў межах гэтай ідэі мы працуем з падлеткамі, бо калі жанчына ўжо трапляе ў абартарый, гутарыць з ёй позна. Таму мы праводзім асветніцкія мерапрыемствы і з дзяўчынкамі, якім толькі споўнілася 14 гадоў. І вось гэтая брашура менавіта для падлеткаў», — расказвае Вераніка Сярдзюк.

Зараз, прызнаецца Вераніка, брашуру гэту цэнтр ужо не распаўсюджвае.

«Не, не таму што я змяніла нейкія свае погляды, а проста з’яўляюцца новыя тэмы, па-іншаму падаецца матэрыял. Напрыклад, наш новы буклет называецца «Цнота». Ён на беларускай мове і цалкам складзены з фальклорнага матэрыялу, у якім падкрэсліваюцца сямейныя каштоўнасці».

«Я — жонка праваслаўнага святара. І я нават не магу ўявіць, што буду штосьці казаць супраць цнатлівасці. Хоць я і культуролаг, і старшыня грамадскага аб’яднання, але ўсё адно мяне ўспрымаюць як голас царквы», — прызнаецца Вераніка.

Сярдзюк прыгадвае, што перад тым, як надрукаваць буклет, арганізацыя правяла апытанне сярод падлеткаў 14-16 гадоў пра тое, ці гаварылі з імі бацькі пра першы сэксуальны досвед.

«У 15% выпадкаў бацькі гаварылі з дзецьмі на гэтую тэму, нават далі дзецям кантрацэптывы. У 10% выпадкаў бацькі тлумачылі дзецям, што нельга займацца сэксам да шлюбу, у 75% бацькі наогул не гаварылі з дзецьмі на гэтую далікатную тэму. Таму мы і вырашылі, што пры дапамозе сваёй брашуры раскажам падлеткам пра тое, як важна захоўваць цнатлівасць».

«Брашура не забараняе, яна прымушае задумацца, а ці варта яно таго. І адмова ад палавога жыцця ў падлеткаў — гэта 100% гарантыя захавання здароўя», — лічыць Вераніка Сярдзюк.

А наконт пытання, чаму брашурка адрасаваная толькі дзяўчынкам, Вераніка патлумачыла:

«Прымаюць рашэнне аб уступленні ў блізкія адносіны ў асноўным жанчыны. І наступствы блізкасці ў большай ступені тычацца жанчын — мужчына ж не зацяжарыць».

«Наша арганізацыя за тое, каб людзі ўступалі ў інтымныя адносіны толькі тады, калі змогуць несці за гэта поўную адказнасць. Да таго ж дзяўчынкі часцей траўмуюцца падчас інтымнай блізкасці, чым хлопчыкі. Хлопчыкі траўмуюцца падчас гомасэксуальнага палавога акту. Я не буду ўдавацца ў медыцынскія падрабязнасці, але так яно і ёсць. Таму задача нашай арганізацыі — інфармаваць і бацькоў у тым ліку, каб гутарылі са сваімі дзецьмі і на гэтыя тэмы», — расказвае Вераніка Сярдзюк.

На цяперашні момант у арганізацыі працуюць толькі з дзяўчынкамі.

«Хоць ўсё больш бацькоў просяць праводзіць заняткі па палавым выхаванні і для хлопчыкаў. Хаця з нашага досведу працы магу сказаць, што хлопчыкі больш цнатлівыя. Дзяўчынка, якая пачынае палавое жыццё ў падлеткавым узросце, робіць гэта не таму, што патрабуе цела, а таму, што блізкасці патрабуе душа. Такіх дзяўчынак не далюбілі дома, не дапесцілі, не дацалавалі, таму яны шукаюць усё гэта ў чужых мужчын», — перакананая Вераніка Сярдзюк.

Наталля Тур

Каментары
Малады / Адказаць 09.12.2019 / 17:25

Слава Богу за такіх жанчынаў. І так, трэба па-беларуску!

53
Кажыма праўду / Адказаць 09.12.2019 / 17:37

Выглядае, што брашурка – на адчэпнага адпрацаваны грант. Абы-што накрамзалі, абы-як надрукавалі, абы-каму параздавалі. Галку паставілі, справаздачу склалі. Сыпцеся гранцікі шчадрэйша... На вечныя каштоўнасці...

45
Кастусь Шыталь / Адказаць 09.12.2019 / 18:02

Нічога скандальнага ў дадзенай брашуры няма. Сэксуальная ўстрыманасць доўгія стагоддзі была адной з каштоўнасцяў нашай культуры, нашай еўрапейскай цывілізацыі. Добра, што і цяпер, калі свет звар'яцеў, застаюцца людзі, якія працягваюць казаць пра гэтую каштоўнасць.

47
каментаваць

Націсканьне кнопкі «Дадаць каментар» азначае згоду з рэкамендацыямі па абмеркаванні

СПЕЦПРАЕКТ2 матэрыяла Шура-бура