Арганізатары велагонкі ў Бельгіі спынілі спартсменку Ніколь Хансэльман, калі яна здагнала мужчын. Пра гэта піша выданне Cyclingnews.
Спаборніцтвы мужчын і жанчын у гэты дзень стартавалі з аднаго і таго ж месца. Мужчынская гонка пачалася на 10 хвілін раней.
Былая чэмпіёнка Швейцарыі Хансэльман стартавала цалкам удала і нават лідзіравала дзве хвіліны. Але калі яна нагнала мужчынскую частку велагонкі, арганізатары папрасілі яе крыху пачакаць.
«Мы падабраліся заблізка да мужчын, і трэба было захаваць нейтральны прамежак часу паміж гонкамі. Гэта было трохі прыкра, бо ў мяне быў добры настрой. Да таго ж, калі астатнія бачаць, што ты спыніўся, у іх з'яўляецца дадатковы стымул цябе перагнаць», — сказала яна выданню.
Па словах Хансэльман, жаночую гонку перапынілі на пяць-сем хвілін. Калі яе аднавілі, ёй далі фору дзясятак метраў, але ёй не ўдалося ўтрымаць лідарства.
Спартсменка напісала у сваім інстаграме, што адарвалася ад асноўнай групы праз сем хвілін пасля пачатку гонкі і амаль 30 кіламетраў лідзіравала, да таго як адбыўся гэты «няёмкі момант» і яна нагнала мужчын.
«Можа, я і іншыя жанчыны былі захуткімі, ці мужчыны — замаруднымі», — дадала яна.
Nina.nn.by, фота cyclingnews.com