Праект партала
Густ
22.02.2019 / 13:39
Паглядзіце, якую шыкоўную калекцыю нацыянальных строяў пашылі вучаніцы 50-й мінскай гімназіі ФОТАФАКТ5

Пад кіраўніцтвам класнай і настаўніцы працоўнага навучання 8-класніцы з 50-й сталічнай гімназіі пашылі цэлую калекцыю сукенак, натхнёныя нацыянальным арнаментам і сімволікай.

У гімназіі бягучы тыдзень быў цалкам прысвечаны беларускай мове і культуры. Сёння на ўсіх перапынках у калідорах гучалі беларускія вершы і песні, а падчас аднаго з іх дзяўчаты з 8 «А» і 8 «Б» прадэфіліравалі ў сукенках з беларускай сімволікай, пашытых сваімі рукамі на працоўных занятках.

Па словах сведак, мадэляў сустракалі бурнымі авацыямі, а самі дзяўчаты цяпер не хочуць здымаць з сябе абноўкі.

Курыравалі ўвесь гэты працэс класная кіраўніца Ірына Мельнікава і настаўніца працы Алена Палашкевіч. Апошняя і навучыла дзяўчат усім сакрэтам шыцця і вышыўкі.

«Для мяне, як і для вучаніц, задача пашыць нацыянальную сукенку была пастаўленая ўпершыню. У 6-м класе мы са школьніцамі вышываем сурвэткі, але не больш за тое. За натхненне мы ўзялі беларускія арнаменты з розным сэнсам — маці, сонейка, вясна (само сабой, пра кожны з іх на занятках распавядалі дзяўчатам, каб прыстунічаў і адукацыйны момант). Мэтай было не страціць традыцыйны сэнс, але пры гэтым зрабіць сучасны крой, такія мадэлі, якія падабаюцца сённяшняй моладзі», — распавядае Алена Пятроўна.

У распараджэнні ў школьніц было ўсяго тры тыдні: прыходзілася збірацца і ўвечары, і зранку, каб усё паспець. Добрай прадзюсаркай у гэтых умовах стала класная кіраўніца 8 «А», пры дапамозе якой вырашаліся пытанні з графікам, зборам грошай і набыццём тканіны бацькамі.

Працэс быў такі захапляльны, што нават некаторыя хлопцы захацелі таксама навучыцца шыць нешта падобнае, пастаянна заляталі ў клас, дзе ішоў творчы працэс над машынкамі.

Спачатку тканіна абкідвалася ўручную, потым — усё адшывалася на машынцы. Для аздаблення выкарыстоўвалі тасьму і буйныя шарсцяныя ніткі.

«Я сама не чакала, што гэтае заданне выкліча ў дзяўчат такі імпэт. Было бачна, як гарэлі іх вочы. Тыя, хто сёння гладзеў на вынік, казалі, што мы прынеслі ў школу сапраўдны беларускі дух, хадзілі шчаслівыя і з добрым настроем — аказваецца, для гэтага трэба няшмат», — падзялілася з «НН» Алена Палашкевіч.

На жаль, пакінуць сабе гэтую прыгажосць школьніцы не змогуць: па сукенкі ўжо выстраілася чарга з тых, хто жадае выкарыстаць іх на канцэртах і іншых мерапрыемствах. Але цяпер яны могуць пашыць сабе такіх колькі заўгодна. У сярэднім кошт пытання адной сукенкі — каля 100 рублёў.

КК

Каментары
Тарэса / Адказаць 22.02.2019 / 13:56

Божухна! Хоць да шлюбу можна ісьці ў такой прыгажосьці!!! Хачу адкруціць назад 35 гадочкаў ў шлюбе і зноўку пад вянец.Шчыра кажучы, такога хараства і прафесійныя мадэльеры пакуль не прадэманстравалі.

7
Жвір / Адказаць 22.02.2019 / 14:24

Прабачце, але гэта не нацыянальныя строі, а проста фэнтэзі на тэму нацыянальных строяў. Даволі прымітыўныя. Купіце хаця б набор чакаляты "Беларускія строі", ды параўнайце, калі больш няма дзе паглядзець...

35
Цетка Алена / Адказаць 22.02.2019 / 20:12

Прыгожае усе ж такi спалучэнне - белае i чырвонае ! Дзяучвты малайцы ! Дарэмна прэзiдэнт кажа , што нiхто нiчога не умее.

1
каментаваць

Націсканьне кнопкі «Дадаць каментар» азначае згоду з рэкамендацыямі па абмеркаванні

СПЕЦПРАЕКТ2 матэрыяла Шура-бура