Праект партала
Тое-сёе
28.10.2018 / 13:50
Касцюм жэтончыка, панэлькі і не толькі. Ствараем беларускія вобразы на Хэлаўін45

Напярэдадні Хэлаўіна, які ў Беларусі нефармальна святкуюць усё больш актыўна, мы вырашылі крыху пафантазіраваць і замест папулярных персанажаў для касплэю накшталт вядзьмарак, вампіраў ці герояў Marvel Comics падумаць над беларускімі варыянтамі.

Пасля гарачых абмеркаванняў было вырашана паспрабаваць пераўвасобіцца ў жэтончык мінскага метрапалітэна, панэльку, супрацоўніка Мінскзеленбуда і адзін з бонсцікаў. Усе гэтыя вобразы ствараюцца хутка (што асабліва актуальна, калі вечарына не за гарамі) і не патрабуюцць шмат фінансавых выдаткаў. Але галоўны іх плюс, канешне, у непаўторнасці.

Бонсцік Вадзянік

Як вядома, новыя, ужо пятыя па ліку бонсцікі ствараліся паводле міфаў і легенд Беларусі — кансультацыі давалі нават супрацоўнікі Нацыянальнай акадэміі навук. Сярод 24 персанажаў нас скарыў гаспадар рэк і азёр Вадзянік, які больш за ўсё любіць «палохаць людзей, калі яны купаюцца ноччу. Баламуціць дно, пускае бурбалкі, плешча рукамі па вадзе і ганяецца за качкамі вярхом на сваім соме».

Для касцюма Вадзяніка бяром сінюю тканіну, як на коўдру, вусы і чырвоны кубак. З тканіны шыем нешта накшталт кароткага скафандра, фарбуем загадзя набытыя карнавальныя вусы.

Падчас падрыхтоўкі да Хэлаўіна мы згадалі пра трэнд на каляровыя валасы, які адрадзіўся і не сціхае ўжо другі год. Вядома, мала хто гатовы кардынальна змяніць колер на працяглы час. Аднак выхад знайшоўся! Для паўнаты вобразаў мы вырашылі скарыстаць лінейку адценачных бляск-бальзамаў Hot Colors ад «Беліта-М». Згодна з абяцаннямі вытворцы, бальзамы даюць патрэбнае адценне максімум на 2-3 тыдні.

Амаль паловай рэдакцыі мы пратэставалі адценачныя бальзамы на сабе. Спойлер: было весела, і нашы трэндавыя прычоскі атрымалі шмат кампліментаў ад выпадковых мінакоў.

Валасы нашага Ягора да афарбоўкі і пасля. Фарбаваўся ён бальзамам «Электрычны сіні».

Беларуская панэлька

Панэлькі — гэта тое, што ўсіх нас тым ці іншым чынам яднае. Чамусьці больш за ўсё ў Мінску імі славіцца Каменная Горка, але такі тып забудовы знойдзецца ў любым беларускім (і не толькі) раёне.

Каб стаць панэлькай, вам спатрэбіцца ўсяго нічога: кардонная каробка, фарбы, па жаданні — тканіна для будучых фіранак. Самае вясёлае ў стварэнні гэтага касцюма — канешне, размалёўка каробкі. Дайце волю фантазіі, уявіце, што можа адбывацца за акном кожнай кватэры дома, які вы ствараеце.

Дадаём валасам Волі больш «панэльнага» адцення з дапамогай бальзаму «Бліскучы графіт».

Супрацоўнік Мінскзеленбуда

Стваральнікі самых неверагодных і касмічных кветнікаў, тыя, хто падтрымліваюць у парадку сталічныя паркі і газоны — мы не маглі абмінуць увагай людзей, якія робяць Мінск зялёным і яркім.

Самыя добрыя супрацоўнікі гэтага прадпрыемства працуюць у Фрунзенскім раёне — менавіта яны дармова падзяліліся з намі формай са склада. Разынкай жа вобразу мы зрабілі вянок з восеньскага лісця.

Каця фарбавалася адценачным бальзамам «Дзёрзкі смарагд».

Жэтончык мінскага метрапалітэна

Жэтоны — самая надзейная беларуская валюта з 1992 года: менавіта тады ў метро пачалі выкарыстоўваць першыя малінавыя кругляшы. Калі не звярталі ўвагу, то паглядзіце: менавіта гэтая дата выгравіраваная на кожным жэтоне.

За 26 год нашы жэтоны перажылі не адну дэвальвацыю і дэнамінацыю, так што стварэннем касцюма ў іх гонар мы, можна сказаць, здымаем перад імі капялюш. Каб знайсці колер, блізкі да арыгіналу, мы змяшалі ружовую, чырвоную і фіялетавую гуаш.

Што тычыцца валасоў Наталлі, то тут вобраз жэтончыка перадаваў бальзам «Агнявы Фламенка».

Як вам нашы вобразы? Калі спадабаліся, паспрабуйце паўтарыць самі да 31 кастрычніка — сябры дакладна адзначаць ваш крэатыў. 

ТАА «Беліка-М», УНП 190839042

Кацярына Карпіцкая, фоты Волі Афіцэравай

Каментары
le mantar / Адказаць 25.10.2018 / 08:45

Агонь :) Дык а фарба тая змылася пасля?

10
Зiма / Адказаць 25.10.2018 / 08:46

Акадэмiя навук чамусьцi не прапанавала вобраз бутэлькi чарвiукi якую вынайшлi нашыя навукоуцы.

4
Рыгоравіч / Адказаць 25.10.2018 / 08:49

Клоуны

15
каментаваць

Націсканьне кнопкі «Дадаць каментар» азначае згоду з рэкамендацыямі па абмеркаванні

СПЕЦПРАЕКТ2 матэрыяла Шура-бура