Гатуем рыбу па-новаму — у паніроўцы з грэцкімі арэхамі
Канечне, усе мы чулі, што рыба і морапрадукты надзвычай карысныя і трэба як мага больш дадаваць іх у свой рацыён. Але мора свайго ў нас няма, а беларускія крэветкі — гэта толькі нагода пажартаваць. Вось нам і застаецца выкарыстоўваць з большага адны і тыя ж віды рыбы. І таму кожны раз, гатуючы яе, хочацца дадаць пэўнага насычанага смаку.
13.04.2019 / 11:56
Для сённяшняга рэцэпту вы можаце ўзяць не толькі траску, але і любую «мясістую» белую рыбу. Пажадана філе, каб за сталом ні пра што не хвалявацца, а толькі атрымліваць асалоду ад смаку.
Нам спатрэбіцца:
- 500 гр. філе траскі;
- 60 гр. масла;
- 50 гр. грэцкіх арэхаў;
- 50 гр. паніровачных сухароў;
- 50 гр. пармезану;
- цэдра 1 лімона;
- соль, перац;
- алей.
На соус:
- 100 мл нятлустай смятаны;
- 100 мл вады;
- 1 ст.л. каперсаў;
- некалькі галінак пятрушкі.
Філе прамакнуць папяровым рушніком і выкласці на процівень, змазаны алеем. Філе солім і перчым.
Гатуем пасыпку. Мелем арэхі, тром пармезан на дробнай тарцы, змешваем разам з сухарамі і цэдрай, дадаем мяккае масла і добра змешваем. Атрыманую пасту выкладаем на рыбнае філе.
Запякаем рыбу пры 180 градусах прыкладна 20-25 хвілін.
Тым часам прыгатуем соус. Смятану змешваем з вадой і, пастаянна памешваючы, падаграем, не даводзячы да кіпення. Дадаем соль, перац, дробна нарэзаныя каперсы і пятрушку. Паліваем соусам рыбу. Можна яшчэ трохі апырскаць лімонным сокам.
Смачна есці!