Спакуслівы водар гэтага штолена вас зачаруе РЭЦЭПТ
Штолен — гэта традыцыйны нямецкі калядны кекс. Яго выгляд і форма сімвалізуюць спавітага немаўлятку Ісуса. Рэцэптаў яго існуе вялікае мноства. Звычайна штолен пякуць за 2-3 тыдні да Раства, каб ён мог «саспець», а ўсе смакі цалкам раскрыліся.
30.12.2017 / 18:16
Але нішто не замінае пачаць есці яго ўжо на наступны пасля выпечкі дзень, як гэта зрабілі мы — надта ўжо спакуслівы водар разносіўся па кватэры. І трэба сказаць, што нават «няспелы» ён неймаверна смачны. А патрэніраваць прадбачлівасць і сілу волі, думаю, нагода яшчэ будзе:) Хоць, вядома, лепей даць штолену паляжаць хаця б некалькі дзён — напрыклад, да праваслаўнага Раства, калі спячы яго цяпер.
Вам спатрэбіцца:
- каля 300 г мукі
- 1,5 ч.л. разрыхляльніку
- дробка солі
- 125 г цукру
- 200 г тварагу
- 100 г масла
- 1 яйка
- цэдра і сок паловы лімона
- 50 г міндалю
- 50 г разынак
- 50 г сушаных журавін
- 100 г курагі
- 25 г апельсінавых цукатаў (у мяне не было, узяла цэдру 1 апельсіна)
- па 0,5 ч.л. ванільнага і міндальнага экстрактаў (можна без іх, альбо замест ванільнага экстракту ўзяць пару лыжак ванільнага цукру)
- каля 50 г масла для прапіткі
- цукровая пудра для пасыпкі
Як гатаваць:
1. Курагу дробна парэзаць, разам з астатнімі сухафруктамі заліць невялікай колькасцю алкаголю (рому, каньяку, брэндзі) і пакінуць на суткі (альбо хаця б на ноч).
2. Міндаль пасячы.
3. Мяккае масла ўзбіць з цукрам. Працягваючы ўзбіваць, дадаць яйка, тварог (ён павінен быць гладкі, у разе патрэбы працерці яго праз сіта), цэдру і сок лімона і экстракты.
4. Змяшаць муку з разрыхляльнікам і соллю, паступова ўсыпаць у масляна-тварожную сумесь (мукі можа спатрэбіцца крыху болей). Дадаць арэхі, потым сухафрукты з цукатамі, добра перамяшаць.
5. Сфармаваць штолен (чым апісваць словамі, прасцей паглядзець у гугле, як гэта робіцца). Выпякаць каля 50-60 хвілін на 180°С.
6. Яшчэ цёплы штолен шчодра змазаць растопленым маслам і пасыпаць цукровай пудрай. Цалкам астудзіць, шчыльна загарнуць (напрыклад, у фольгу, потым пакласці ў пакет і завязаць) і пакінуць «выспяваць» пры пакаёвай тэмпературы.
Смачнага вам Новага года!
Гатуйце таксама:
- Ідэальныя зімовыя пернічкі
- Шакаладнае печыва з марцыпанам
- Міндальныя снежкі — нямецкае каляднае печыва
- Макавыя сырнікі ў духоўцы
- Запечаны камамбер і грушы з блакітным сырам ды арэхамі
- Духмянае яблычнае печыва
- Кошычкі з яблыкамі і швейцарскай мерэнгай
- Бліны з сырам і зелянінай
- Аладкі з яблыкамі
- Гарбузовы кекс з яблыкамі, журавінамі і арэхамі
- Печыва з журавінамі
- Яблычны кекс з сырам